XA TES O TEU CARNÉ DE PAPALIBROS?

 Por se alguén o esqueceu, seguimos o carné de Papalibros segue funcionando. Tes que pedilo na biblioteca, cubrir os teus datos e no reverso cubrir ata seis lecturas non obrigatorias das que darás conta por escrito ou oralmente a Susana Losada, a coordinadora do Club de lectura, o algunha das/os profes de lingua, que selarán cada un deses libros. Por cada carné completado recibirás un vale de 10 € para gastar en varios establecementos da vila de Melide. Podes conseguir ate cinco vales por cada curso académico.

A primeira en estrear esta nova tempada de carnés foi Eva Vázquez Castro, que sempre presenta un resumos impecables e moi ben redactados das súa lecturas. Parabéns, Eva!

ARRINCAMOS UN NOVO CURSO

Por fin arricamos este novo curso, desta vez un pouco máis tarde do habitual, pero con moitas ganas, sobre todo no club de benxamíns, no que tivemso que facer dous grupos que pasan dos 20 rapaces e rapazas cada un. Como novidade, este curso contamos coa axuda e bo facer de Sylvia Cea, profe de lingua galega, e Cristina Conde, profe de lingua española, antiga alumna do IES de Melide e, sobre todo, antiga Papalibros. Neste club imos facer lecturas compartidas, e comezamos cuns relatos de medo de Anxel Fole, por coincidir as nosas reunións nas datas do Samaín.

No club de xuvenil temos menos alumnado, apenas un grupiño de dez persoas, pero xa lectoras e lectores maduros. Comezamos coa lectura de Antología, de K. Otomo, un clásico do manga que nos entusiasmou.

 No club de adultos estamos arredor de 15 persoas entre nais de exlamn@s, ex-alumn@s, profes, exprofes... Comentamos as lecturas que limos durante este verán: As malas mulleres, un marabilloso relato de Marilar Alexandre que nos dá a coñecer a situación da muller nos cárceres do século XIX e o labor de Concepción Arenal e Juana de Vega. Outro libro que limos foi Nus, de Manuel Gago, unha semi-ficción ambientada na Galicia dos anos 80 do século XX que ve xurdir o movemento nudista nos comezos do seu goberno autónómico e que non nos decepcionou, como as anteriores obras deste autor.

Agardamos poder facer reunións presenciais todo o curso e poder disfrutar dun montón de encontros e lecturas.

VOLVEMOS VERNOS!!

 Despois dun curso terrible sen poder xuntarnos fisicamente, sempre separados por grupos, por fin retomamos as nosas reunións presenciais, a provietando o bo tempo.

Así como co club de adultos fomos quen de manter o noso calendario con reunións telemáticas, cos clubs de lectura xuvenil e benxamín as reunións virtuais non funcionaron.

Agora en maio estamos a facer lecturas compartidas. En 1º de ESO estamos a ler Morning Star de X. Miranda e en 2º de ESO e con 3º e 4º leremos fragmentos de Nada de Carmen Laforet.

Contamos con moitísimo alumnado en 1º de ESO, máis de 30 lectores que fan que teñamos que desdobrar as nosas reunións en dosu grupos. Agardamos que o curso que vén continúen todas e todos estes lectores coa todas as ganas que xa demostraron neste curso, a pesares das dificultades.

OS PAPALIBROS RECITAN POESÍA

Coincidindo coa chegada da primavera, celebramos o día da poesía o 21 de marzo. Como no IES de Melide son tantas os e as poetas que nos gustaría ler, fixemos recitais nos recreos de toda esta semana de marzo. Limos poesía en galego, en castelán, en inglés, en portugués, en francés, en grego antigo, en rumano e en árabe. Clásicos como Rosalía de Castro ou Celso Emilio, recitáronse xunto con autoras e autores novos como María Lado ou Lucía Aldao. En ligua castelá escoitamos a León Felipe, Gloria Fuertes, Miguel Hernández, Lorca, Octavio Paz o Gilde Biezma...  O alumnado de 2º de BAC de literatura galega do XX incluso compuxo  fermosos caligramas que compartiu con todos nós na biblioteca.

Un dos nosos Papalibros de 2º de ESO, Jesús J. Vicente Peris, fixo un fermoso poemiña sobre a lectura, case a modo de haiku, e compartiuno con todos nós na biblioteca.

O broche de ouro da semana foi o recitado de Os Pinos, o famoso poema de Eduardo Pondal que serviu de letra ao noso himno galego, ao tempo que Lola Corzo o interpretaba en lingua de signos, mentres sonaba a versión interpretada por Lucía Pérez. Pura poesía.

AS PAPALIBROS ADULTAS TAMÉN VOLTAMOS!

 O mércores 21 de outubro tamén foi o día no que o club de adultos reanudou a súa actividade. Debido as condicións sanitarias tamén tivemos que facer dúas quendas no club de adultos, porque somos un grupo numeroso que supera as 20 persoas. A seguinte quenda de xuntanza, que tería lugar o luns 26 de outubro na non puido levarse a cabo por orde da inspección educativa, tal como explicamos máis abaixo.

Aproveitamos o verán para ler a Blanco Amor, Xente ao Lonxe e A Esmorga, que eran obras fáciles de conseguir para case todas as papalibros adultas en tempos de semiconfinamento. Nesta única sesión que poidemos celebrar con dez persoas contamos tamén coa compaña de Paco Veiga, que nos aportou datos interesantes que nos axudaron a enteder  mellor a obra de Blanco Amor.

Ambas obras desenvólvense na Auria de principios de século XX, o Ourense natal de Blanco Amor. Resulta abraiante o coñecemento exhaustivo da vila e da lingua das clases populares que amosa na Esmorga para unha persoa que levaba tantos anos na Arxentina afastado do seu país. Cibrán o Castizo narra ante un xuíz unha xornada de troula na compaña de Xan, o Bocas, e Aladio, o Milhomes, que como na traxedia grega vai reunindo todos os ingredientes para un final fatídico. Os personaxes van facendo a súa odisea polas rúas e tabernas de Auria baixo unha choiva persistente que non dá opción a que os personaxes escapen que da fatalidade, que culmina no Campo das Bestas, o basureiro da cidade, a modo de descenso aos infernos, lugar común da literatura clásica. Un relato cunha importante carga de crítica social, de denuncia dos abusos das forzas da orde, da inutilidade da xustiza, da prepotencia das clases poderosas e unha chamada de atención a diferente condición sexual de algúns, construído cunha técnica narrativa innovadora e revolucionaria no seu momento.

Xente o lonxe ofrécenos unha visión coral do Ourense de principios de século no contexto da loita do movemento obreiro. Entre os personaxes destaca como líder natural Aser, o loitador xusto, coherente e honesto, que se entrega á causa obreira, o pai do narrador, pero son realmente as mulleres os personaxes máis completos e os que moven a acción, como Evanxelina, filla de Aser, herdará os seus ideais e continuará a súa loita ou a señora Andrea, un misterioso e case máxico personaxe é quen de axudar outras mulleres sacundido o poder patriarcal e facendo xustiza á súa maneira. A diferenza dos personaxes da Esmorga, os personaxes de Xente a o lonxe son quen de construír un futuro xuntos, a pesares de estar oprimidos.

Se melloran as cousas, na preimavera faremos en Ourense o roteiro da Esmorga e faremos por visitar o belén de Baltar, na Praza de San Cosme e Damián, en plena ruta da Esmorga, que tan ben retrata a eses xentes de Auria das que fala Blanco Amor.

Aínda coas máscaras, coas restriccións e coa distancia foi unha alegría poder xuntarnos fisicamente. A próxima quedada será por vídeo-conferencia para falar da nosa próxima lectura Del color de la leche, de Nell Leyshon. Oxalá poidamos recuperar a normalidade e volver neste curso ás nosas reunións de antes. Mentres, seguimos en contacto a través dese fío máxico que son os libros.

OS PAPALIBROS VOLTAN!!

 As ganas de ler e xuntarnos son tantas que non hai virus que poda cas e cos Papalibros. Esta semana comezamos a activar os nosos clubs de lectura, que este curso serán máis por mor das condicións sanitarias que estamos a vivir.

Este mércores 21 de outubro comezamos por 1º de ESO, onde tivemos que facer dos grupos porque temos case 40 Papalibros!!! Nesta volta tocoulles aos de 1º A e D.

Despois de xantar, seguindo estritamente o protocolo COVID, e xogar un pedaciño comezamos co noso primeiro libro, o cómic Soy una matagigantes, de Joe Kelly e Ken Niimura. Se cadra este non é un libro fácila para comezar en 1º de ESO, pero xa houbo varias rapazas e rapaces que foron quen de entender un pouco a historia que se nos conta, unha historia dunha rapaza bastante rara, Barbara Thorson, que ten un martelos para matar xigantes, ten algúns problemas na escola e parece que na súa casa hai algo raro.

As rapazas e rapaces de 1º de ESO non saben como era antes a biblioteca Xaquín Yebra. Para os que xa levamos un tempo aquí e vimos a evolución da nosa biblioteca ata convertirse nun espazo cálido e acolledor, fáisenos duro vernos así, tan separados, cando sempre adoitabamos arrexuntarnos todos arredor de dúas mesas unidas. Tamén é moi moi raro ver a biblioteca colocada como un aula... pero na situación na que vivimos non nos queda outro remedio.

Aos dous días desta reunión, comunicóusenos que debido ao nivel 2 no que se atopa a provincia da Coruña, non poderemos facer este tipo de xuntanzas ata que melloren as condicións sanitarias. Mentres tanto, aproveitaremos para ir organizando o resto de grupos para cando poidamos volver xuntarnos. E por suposto aproveitaremos para ir lendo moitos libros na casa e nos recreos!

#Papalibros_confinad@s. FELIZ VERÁN CHEO DE LECTURAS!!

Se a lectura foi unha das nosas táboas de salvación durante o confinamento, agora, nesta "nova normalidade", segue sendo o alimento fundamental de tod@ Papalibros. Aínda que non veñas ao centro, non deixes de facer o teu pedido de libros para o verán, terémolo listo na nosa biblioteca para cando veñas polo boletín de notas ou cando poidas pasar por el.

Cubre o seguinte formulario:

Aproveitamos a ocasión para facer un repaso das lecturas lidas neste curso 2019-2020, que por mor do confinamento forn menos quenoutros anos:

Club de Benxamíns:

La mazmora. Corazón de pato, cómic de J. Sfar e Trondheim
Revolución Detrito, Xosé de Cea
Houdini: el rey de las esposas, de Jason Lutes e Nick Bertozzi


Club de Xuvenil
Revolución Detrito, Xosé de Cea
Izan o da saca, Xabier Quiroga
El arte de volar, A. Altarriba e Kim
Arctic-Nation, cómic da serie Blacksad, Juan Díaz Canales e Juanjo Guarnido


Club de Adultos
Seique, Susana Aríns
Cuatro hermanas, Jetta Carleton
Todo canto fomos, de Xosé Monteagudo
Sen piedade, de Pedro Feijóo
Presas fáciles, de Miguelanxo Prado
Patria, de F. Aramburu

#Papalibros_confinad@s: Patria, de Fernando Aramburu

No Club de adultos animámonos a reunirnos por Webex para falar de Patria, de Fernando Aramburu, a nosa última lectura antes do confinamento. A reunión estaba prevista inicialmente para o 25 de marzo e, querendo ser positiv@s, pensamos que estes dous meses de retraso fixérennos asentar un pouco máis a lectura.
Patria afronta o conflito vasco presentándonos a dúas familias que poderían ser representantes dunha boa parte da poboación de Esukadi: unha familia vítima de ETA, e outra abertzale na que un dos seus membros é un preso da banda armada. Máis que a vítima, el Txato, e o seu posible verdugo, Joxe Mari, as figuras centrais destas familias son Bitorri, a viúva do Txato, e Miren, a nai de Joxe Mari, auténticas matriarcas, noutro tempo amigas íntimas e agora enfrontadas. Xabier, o honesto fillo de Bitorri, que vive nun pozo de tristeza do que non pode saír, Nerea, a filla que baixo unha fachada de frivolidade, intenta levar o dó á súa maneira e pasar páxina. Aránzazu, a filla de Miren, xusta, íntegra e valente que parece expiar as culpas da familia sufrindo un ictus que a deixa encarcerada nun corpo inerte. Gorka, o fillo pequeno e poeta de Miren, que consegue escapar da presión abertzale do pobo e facer a súa vida xunto ao home que ama. Joxian, o marido de Miren, que deixa que decidan por el e non tivo a valentía de seguir estando ao lado do Txato, o seu amigo da alma, cando empezou a recibir ameazas. Outros moitos personaxes pululan ao longo da novela: Guille, o marido de Aránzazu, nacionalista español, Quique, o vividor, case playboy marido de de Nerea que non se decanta claramente, pero odia a ortodoxia abertzale, o cura don Serapio bendecindo as accións violentas, as veciñas e veciños, amigos... paralizados polo medo.
Mari Pardo, que viviu no País vasco até os 20 anos axudounos a entender moitas cousas e compartiu con nós as súas vivencias do conflito. Na nosa charla chegamos a conclusión de que Patria é un relato áxil, as súas máis de 600 páxinas lense con moita facilidade. Escasean as descricións, os personaxes defínense polos seu diálogos, polas súas palabras nunha linguaxe repleta de xiros e modismos vascos. Mari, que viviu no País vasco até os 20 anos axudounos a entender moitas cousas e compartiu con nós as súas vivencias do conflito.
O autor, que escribe o libro despois do anuncio do alto ao fogo de ETA, é capaz de manter a tensión nun relato no que xa coñecemos o final tráxico e que parte en busca dunha explicación que permita entender os feitos e dunha reconcilación que finalmente lógrase. Non só se denuncia a violencia que sofren as vítimas, senón tamén o ostracismo ao que se condena ás súas familias, o turbio papel da igrexa ou de algúns curas, a violencia empregada polas forzas da orde en comisarías e prisións, a manipulación dos militantes máis novos pola banda armada... E despois de todo isto xorde a pregunta, son sólo vítimas de ETA os e as que sufriron a súa violencia directa ou tamén todas aquelas persoas que sacrificaron as súas vidas e os seus soños por unha idea de patria falsa e excluínte que lles venderon?.

#Papalibros_confinad@s. Celebramos o día do libro.

Está claro que a lectura é unha das nosas mellores aliadas para levar o confinamento. Así celebramos o día do libro @s Papalibros. Veña, Papalibros, animádevos e mandade as vosas fotos! Sempre é o día do libro!!

Pila de libros de Noa Varela Pardo, de 4º de ESO

Lúa Varela Pardo, de 1º de ESO con algúns dos seus libros favoritos

Icía García Carregal, de 3º de ESO xuntou un montón novelas e os seus mangas favoritos

Carmen Vicente, de 3º de ESO, escolleu A todos los chicos de los que me enamoré de Jenny Han

María Fuciños, de 2º de BAC, De catro a catro, de Manuel Antonio, todo un clásico da poesía galega na preciosa edición de El Patito Editorial, ilustrado por Pablo Otero

#Papalibros_confinad@s

Con esta especie de hahstag, #Papalibros_confinad@s, @s Papalibros estamos intentando compartir as nosas lecturas durante o confinamento facendo vídeos moi curtiños, de menos de dous minutos nos que despois de presentarnos, comentamos como nos axuda a lectura no confinamento e falamos dun libro.
No club de adultos animámonos e, aínda que moitas non controlamos moito de imaxe, si que conseguimos comunicar o que nos aporta a lectura, que é o que importa. Veña, a que agardades @s máis nov@s?

LECTURAS PARA PASAR O CONFINAMENTO

A estas alturas, cando xa levamos preto de tres semanas confinad@s non imos a pararnos aquí a definir esta situación tan anómala que podería ser unha distopía. Xa tivemos tempo de pensar, reflexionar e calquera cousa que digamos vai ser unha repetición.

O que si que está claro é que a lectura é unha desas táboas de salvación para poder pasar o confinamento. Con ela podemos saír as rúas, subir montes, surcar mares, atravesar selvas ou desertos... en fin, viaxar sen límite sen saír da casa.

Aproveitemos que estes días hai un montón de editoriais e portais nos que podemos descargar libros. Deixámosvos aquí unha ligazón da editorial Astiberri para descargar gratuitamente un cómic con 17 relatos moi recomendables para poder ler cómodamente en PDF nas nosas casas:

https://www.astiberri.com/products/lecturas-a-domicilio-libro-verde

E agora deixámosvos recomendacións lectoras dunha das nosas youtubeiras favoritas, Nubes Baixo Ti. 

ENCONTRO CON POETAS DA TERRA MELIDE... E MÁIS ALÁ

A semana pasada no club de adultos tivemos a sorte de contar coa presenza de Antom Laia, poeta melidense, e Teresa Ramiro, poeta da ría do Burgo, para falar dos seus respectivos libros No Cinzel Livre das Securas e Fundido a negro.
O noso encontro foi máis ben un recital poético que arrincou co potente son da buguina que soprou Teresa, introducíndonos de cheo no seu universo poético no que o mar é omnipresente, así arrinca tamén Fundido a negro: "Entre os dedos/ unha espiral de salitre/ na boca/ doídos silencios/ no ar o bruar da buguina".
Evocacións de lugares mariños, infancia e saudade dun pasado, presenza da morte, de sombras... a poesía do cotiá, da vida mesma, o compromiso que impera tamén na poesía de Antom Laia e, común aos dous poemarios, a presenza de mulleres poderosas, empoderadas "E elas, soinhas e balteiras, Marias comunais/de maôs e vigor, escano a escano, tras escano:/ resistirom,/ termaron,/ rebelarom/ para verter nos horizontes-passo a passo-/ umha trave de ouro e dignidade..."
Unha xornada estupenda para o noso club de aldultos, que andaba un pouco falto de poesía.

REVOLUCIÓN DETRITO CON XOSÉ DE CEA

A pesar da súa miseria, Ticho cría nos contos de fadas. Decotío, a esperanza dos pobres ten forma de milagre, de maná caído do ceo, de fada madriña que che vén sacar das leas a golpe de variña máixica. Así e todo, crendo como cría nos contos de fadas, Ticho quedou de pedra cando topou cun trasno na mina de carbón na que traballaba.

Así comeza Revolución Detrito, a última novela de Xosé de Cea, escritor melidense con quen tivemos a sorte de compartir a nosa última sesión de club de lectura.

Revolución Detrito, que pode ser clasificada como novela distópica, discorre na República de Ocidia, un estado totalitario que recorda a demasiadas dictaduras dos nosos tempos, gobernada con man de ferro, após dun golpe de estado, por un dictador de nome rimbombante alcumado Napialatón, que tamén nos resulta extremadamente familiar. A descrición do aparato e mecanismos de poder son un déjà vu, fascismo fachendoso, ignorancia, incompetencia e cinismo. Un mundo desigual que aboca á miseria á maior parte da sociedade, un mundo do revés onde os nenos teñen que traballar para manter á súa familia. Ticho é un destes nenos que dende os oito anos deslómbase nunha mina xunto coa súa irmá Area, que traballa nun vertedoiro. O seu pai, Papá Dimas, quedou eivado sen atención de ningún tipo e súa nai, mamá Melba, supostamente emigrou para mellorar as súas vidas.

Pero o que a nós pode parecernos unha distopía é unha realidade en moitas partes do mundo. Xosé veu provisto de fotos de nenos traballando en minas e vertedoiros que poderían ser ilustracións da novela. Sen ir máis lonxe foi unha realidade no noso país até hai ben pouco. O dedicatario do libro é o pai do autor "que, con trece anos, xa traballaba picando pedra nunha canteira... tres pesetas á hora, oito horas ao día, mellor que coidar ovellas...".

O único xeito de saír deste pesadelo vai ser unha revolución artellada na clandestinidade polos disidentes do réxime e Ticho e Area, sen sabelo, van xogar un papel fundamental. O encontro de Ticho con ese trasno que se anunciaba no comezo marcará un punto de inflexión nas súas vidas. A revolución fará caer o réxime e traerá a xustiza, pero terá un alto prezo para Ticho e Area. Non é un conto de fadas perfecto.

Sen ser un conto marabilloso, esta lectura amósamos que ás veces as revolucións só son posible se cremos na maxia, se loitamos contra o imposible. Ticho é o elixido precisamente por crer nos contos marabillosos.

A hora e pico que puidemos estar con Xosé de Cea pasou voando. Non podemos facer outra cousa que recomendar este libro que, aínda que estea editado na serie xuvenil de Xerais Fóra de Xogo, parécenos moi acaído para lectoras e lectores de todas as idades. Con razón esta novela resultou finalista do XII Premio Raíña Lupa de Literatura Infantil e Xuvenil. Parabéns, Xosé, e agardamos con ansia unha nova obra.

OS PAPALIBROS VAN DE COMPRAS!

Como vén sendo costume, xa case institucionalizado, os Papalibros celebramos o comezo dun novo curso de lecturas cunha viaxe a Compostela para asistir a un espectáculo do Festival Internacional de Títeres Galicreques 2019. Como xa explicamos máis abaixo, o espectáculo foi Cronopios, a cargo de Tres Tigres Teatro, Títeres Cachirulo y Chachakün e previamente informámonos un pouco sobre Julio Cortázar e o seu mundo de cronopios, famas e esperanzas.
Pero para moitos Paplibros o mellor desta xornada forn as visitas, máis rápidas do que nos gustarían, que fixemos ás librarías Follas Novas e Alita, esta última especializada en manga e cómic.
Mercamos nas dúas libros para a biblioteca elixidos polos Papalibros. Nos dous establecementos foron moi amables con nós. En Follas Novas incluso nos agasallaron a cada un cun libriño.
Tivemos que rexistrar a toda présa as novidades mercadas e xa voaron dos andeis, pero pásate pola biblioteca, que aínda queda algo.

INAUGURAMOS O CLUB DE ADULTOS CON SUSANA S. ARÍNS

O pasado mércores 9 de outubro arrancamos o club de adultos cunha invitada de luxo, Susana Sánchez Aríns, para falarnos do seu libro Seique. Como en anteriores ocasións, cando temos unha escritora ou escritor convidado, acudiron tamén a nosa xuntanza algunhas (ávidas) lectoras do Club de xuvenil, como Omaira Vidal e María Fuciños.
Para definir este libro non podemos evitar repetir o que din as lapelas: "Seique non é un poemario, Seique  non é unha novela, Seique non é un ensaio, Seique non é unha investigación histórica, porén, Seique recolle algunha cousa de cada un deses xéneros...". Seique é un relato poético que nos mergulla na memoria e o esquecemento dun pasado familiar no que conviven vítimas con verdugos.
Ao modo dunha rapsoda, no seu sentido etimolóxico de "zurcidora de cantos", a autora vai cosendo triscos de conversas que escoita na casa e fóra dela, triscos de historias que non están nos arquivos porque aínda que "a história a escrevem os vencedores, mas também é certo que a inescrevem", os paseos, as execucións, os expolios, a  múltiples formas de represión... no ficaron por escrito.
Susana S. Aríns ten a valentía de tratar de reconstruír a historia dun seu tío que foi un temido represor da zona do Salnés, unha persoa ruín que era malo tamén de portas para adentro. Ao longo do libro repétese a modo de coro de traxedia grega "Se foi así de malo cos seus, como sería cos de fóra". Ten a valentía de reabrir feridas para tratar de sandarlas, de seguir adiante a pesares do medo de que o pus da ferida alcance aos que aínda están vivos e medraron "com a sensaçao de que seu pai pôde ser culpável de algum tipo de delito ou de que pôde ter un comportamento similar ao dos repressores."
As case tres horas que estivemos con Susana pasaron voando. Apenas nos chegou o tempo para falar do libro, da memoria e desmemoria histórica, das vítimas. Coñecimos primicias da segunda edición de Seique como historias engadidas do tío Manuel, un magnífico cadro xenealóxico a cargo da ilustradora Rosa Herraiz Cabanas e as fotografías familiares que compartiu connosco Susana.
Onte enterámonos de que a súa tradución ao castelán Dicen acaba de gañar o premio ao "Mejor libro del año" na categoría de ficción que concede o Gremio de Libreros de Madrid. Merecidísimo, parabéns, Susana, agardamos con ansia ese roteiro prometido e esa 2ª edición que ten que estar a puntiño de saír.

INAUGURAMOS NOVA TEMPADA

O pasado mércores 9 comezamos as nosas sesións de Papalibros cos máis novos, o club de Benxamíns, ao que pertencen as rapazas e rapaces de 1º e 2º de ESO. A moitos xa lles tardaba e levaban varios inquedos polos corredores, atrás da coordinadora para que dese xa o pistoletazo de saída.

Foi unha reunión intensa na que repartimos as nosas (chulísimas) bolsas promocionais e carnés de Papalibros a todos os novos, recollimos fichas de inscrición e autorizacións e planificamos a nosa primeira saída, asistencia ao espectáculo Cronopios, dentro do Festival Galicreques 2019, que xa ven sendo un clásico co que soemos inaugurar a nosa temporada.

Para poder entender mellor o espectáculo que imos ver, explicamos quen foi Julio Cortázar e limos o conto Comercio do seu libro Historias de Cronopios y famas.

Nesta reunión, Jacobo Vaamonde, que acaba de incorporarse ao nos club, falounos do seu libro, Jacobo y su mundo, e da súa canle de YouTube. Tamén nos contou como conseguiu publicar o seu libro e anuncionos unha presentación No Museo Terra de Melide para o sábado 26 de outubro.

E como non podería ser doutro xeito, nesta reunión repartirmos a nosa primeira lectura: La mazmorra. Zénit 1. Corazón de pato, un cómic de aventura e fantasía, que rebosa sentido do humor a cargo de L. Trondheim e L.  J. Sfar. Todas e todos a ler!!!

A FILLA DO MINOTAURO, DE MARILAR ALEIXANDRE

Este é o vídeo que Icía García Carregal presentou ao concurso Reto Lector 2019, que organiza a editorial Galaxia e que está a punto de publicar a súa resolución.
Non falaremos moito do libro, que é unha lectura moi recomendable, porque cremos que non o imos facer mellor que Icía, quen  en menos de dous minutos explica xusto o necesario e anima a calquera a lelo.
Estamos cruzando os dedos, que a sorte acompañe a Icía!!

POR FIN O AGASALLO

Xusto a tempo para despedir o club de adultos con Manuel Gago chegou un pequeno agasallo para os Papalibros: unha bolsa de tea promocional cun fermoso texto de Chimamanda Gnozi Adichie:

Leo para que me aloumiñen, leo para que me conmovan, leo para que me recorden a graza, a beleza e o amor, pero tamén a dor e a pena. E todas estas cousas importan. Todas son leccións útiles.

Agora só falta que veñades por ela e a levedes chea de libros para ler neste verán.

DESPEDIDA DO CLUB DE ADULTOS CON MANUEL GAGO

O mércores 12 de xuño despedimos o club de persoas adultas cunha compañía de luxo, Manuel Gago, que acudiu por segunda vez a noso centro para compartir con nós impresións da súa última novela, O exército de fume.
O Exército de fume desenvólvese na Galicia da postguerra, nos anos da 2ª Guerra Mundial e dá conta da conivencia entre o réxime franquista e a alemania nazi deste período. Gago, combinando maxistralemente feitos históricos con fición, cóntanos como un grupo de homes e mulleres unen as súas forzas para frear o avance do III Reich e minar a súa presenza no territorio galego, coa esperanza de que iso podería acabar co réxime de Franco.
Esta é unha novela que homenaxea aos guerrilleiros e guerrilleiras galeg@s antifranquistas, eses heroes que non triunfaron e non pasaron aos libros de historia. Tal como aclara o autor na nota final: "...en que medida o heroe só o é cando resulta vitorioso; de caer derrotado, adoita mergullarse na negrume do esquecemento". Personaxes como Ramallo, Regos, Charo, Camilo... son trasuntos de Foucellas, o Gardarríos, Chelo ou Gómez Gayoso, que aínda non están nos libros de texto.
Por outra banda está a figura do pintor Urbano Lugrís como prototipo do creador brillante atrapado pola miseria moral do franquismo, pero que tamén conseguirá ser un heroe nesta historia.
Tamén poderíamos dicir que esta é unha novela feminista xa que fala de mulleres que queren ser visibles e decidir sobre a súa propia vida, como Celia, unha das protagonistas.

Gago explicounos a xénese desta poderosa historia e ademais fíxonos reflexionar sobre algúns aspectos da nosa propia identidade: porque na cultura galega non temos heroes ou non explotamos a nosa propia historia como sucede noutras culturas?

Este foi o broche de ouro de este curso, no que limos as seguintes lecturas:

Aqueles días en que eramos malas, Inma López silva

No te olvides de recordar, cómic de Peter Kuper

Una temporada para silbar, Ivan Doig

Tú no eres como otras madres : historia de una mujer apasionada , Angelika Schrobsdorff

Austerlitz, W.G. Sebald

La Mennulara, de S. AgnelloHornby

El gatopardo, G. T. di Lampedusa

Contrato con Dios de W. Eisner.

París-Austerlitz, de R. Chirbes

El viaje, cómic de P. Baudoin.

Contrato con Dios, cómic de W. Eisner

Long Play, Lois Pérez

O exército de fume, Manuel Gago

DESPEDIDA DO CURSO EN FURELOS

Como xa vén sendo tradición dos Papalibros, esta última semana de maio, aproveitando o bo tempo, despedimos o curso no Club de Lectura.
O luns a mediodía tocoulle ao club de xuvenil, 3º e 4º de ESO e 1º de BAC. Ao longo do ano limos en común os seguintes libros:

Replay, cómic de Jorge Zentner e David Sala

Era por Setembro, Xabier Quiroga

Paradero Desconocido, Kressmann Taylor

Contrato con Dios,  cómic de W. Eisner

A dúbida, María Reimóndez

Individualmente, as nosas lectoras e lectores leron un montón de títulos máis, que comentamos nas nosas reunións.

O mércores foi a quenda dos máis pequenos, o club de benxamíns de 1º e 2º de ESO. Neste club houbo moita lectura individual ou en pequenos grupos. Devorouse moito manga, que xa non poñemos neste listado, porque non daríamos abasto. En común tentamos ler os seguintes títulos:

Kafka y la muñeca viajera, de Jordi Sierra y Fabra

Soy una matagigantes, cómic de J. Kelly
O corazón de Xúpiter, Ledicia Costas

Cairo Branco, Jack London

Danny o campeón do mundo, Roald Dahl

Temos un agasallo sorpresa para tod@s @s Papalibros, pero non consegui chegar a tempo para esta data. En breve informaremos, estade atent@s.

COMPARTINDO VERSOS CON LOIS PÉREZ

Grazas a unha iniciativa do ENL, asiduo colaborador baixo a coordinación de Marga Quintela, na nosa sesión do club de adultos do mes de maio gozamos da compaña de Lois Pérez, poeta, cronista, roqueiro, músico, locutor radiofónico... e profesor, que veu paliar un pouco a gran carencia de poesía que padecemos no Club de Adultos.
Se xa a lectura da súa obra Long Play puido deixarnos un tanto desconcertadas porque é un libro que rompe moldes, con banda deseñada, versións de cancións, prosa desternillante... a presencia de Lois acabou de rompernos os esquemas por completo, xa no principio, cando sacou a súa guitarra feita cunha lata de diesel reciclada. É que resultou que o noso convidado tamén é luthier!
Nun escenario moi amañadiño, coa axuda do gran David Canoura, a modo de pub, Lois recitou os seus poemas, cantou, berrou e fíxenos cantar e rir bastante a todas e todos coas súas per-versións de cancións.
E no medio desta sesión tan entretida descubrimos un poeta que combina maxistralmente esa viaxe persoal ao lado escuro, irracional...  co xogo continuo, como o que fai coas iniciais L.P. do título, do seu nome e dunha serie de pintureiros personaxes inventados. Un poeta que é quen de encendernos de paixón en Amar en caso de incendio, arder en caso de amor, de denunciar os desastres da guerra no fermosísimo Berce e área ou de explicarnos a diglosia (Lady Glosia!!) cantando Satisfation. Longa vida a Long Play e longa vida á poesía.

Obradoiro de creación literaria: Viva a fantasía

Estamos aproveitando que esta tempada temos no noso centro a Xabier Xil Xardón facendo unha substitución, para que nos imparta uns obradoiros de creación literaria.
No club de benxamíns estamos a traballar co relato fantástico. Xabier repartiunos un material para ter un punto de partida: navia é unha rapaza que vive nunha illa afastada do mundo, que non recibe viaxeiros dende hai centos de anos. Todo o saber dos devanceiros está gardado nunha arca con tres cerrollos, custodiada polas anciáns do lugar. Navia quere coñecer mundo, pero para iso deberá acceder aos documentos da arca, construír unha nave e botarse a navegar nun mar cheo de monstros lendarios e mil perigos descoñecidos.
Navia escribe unha bitácora ou caderno  de viaxe. No décimo terceiro día de viaxe a auga escasea e ela empeza a ter problemas par durmir. Que pasaría no vixésimo quinto día, no sexto ou no décimo cuarto?
Xa levamos dúas sesións e agardámosvos na terceira e derradeira o próximo mércores 20 de marzo.

ENTREVISTA A LEDICIA COSTAS

O pasado venres 22 de febreiro tivemos a sorte de ter a Ledicia Costas no IES de Melide para falar da súa novela O corazón de Xúpiter.
Este foi un libro de lectura en 2º de ESO e na clases de Reforzo estudamos e limos os seus textos. O corazón de Xúpiter cóntanos a historia de Isla, unha rapaza que inicia nas redes sociais unha relación con alguén alcumado Xúpiter, que acabará destruíndoa.
Esta non é só unha novela que nos pon en garda sobre os perigos das redes sociais, senón que é tamén unha novela que nos fala de soidade, de acoso escolar, das falsas apariencias, pero tamén de amizade, de valentía e de amor.
Despois da nosa charla con Leticia puidemos facerlle unha entrevista na nosa emisora Falamelide, para comentar aspectos da súa traxectoria, da súa obra e, en contreto, do Corazón de Xúpiter. Velaí.


 

INAUGARAMOS CURSO CON INMA LÓPEZ SILVA

Esta semana retomamos a nosa actividade no club de lectura Papalibros. O luns tivemos reunión os do Club de Xuvenil, para lectoras e lectores de 3º de ESO en adiante. A maioría de Papalibros Xuvenís son de 3º de ESO e 1º de BAC, agardamos con ansia algunha incorporación dos d@s de 4º, de 2º BAC xa non esperamos moito porque este curso convertiuse xa hai tempo nunha especie de salto de obstáculos no que parece que a lectura, e outras tantas cousas imprescindibles, non han lugar. Fixemos entrega do cómic que imos ler este mes: Replay, de Jorge Zentner e David Sala, que nos conta a historia de dous amigos que se reencontran despois de varios anos de separación levando vidas moi diferentes.
O mércores 3 a mediodía estreábase o club de Benxamíns, no que contamos cun grupiño de magnífic@s e consolidad@s lectoras e lectores de 2º de ESO e un gran grupo de rapaces e rapazas de 1º de ESO no que, afortunadamente, hai moitos mozos, que parecen ser lectores escasos e "especie en risco de extinción". Comezamos informando aos novos Papalibros de como funcionaba o club de lectura, días de reunión, actividades, carné... e rematamos levando a próxima, Soy una matagigantes, o marabilloso cómic de Kelly e Niumura co que xa disfrutaron en anos anteriores algunha promoción de Papalibros.
Na tarde do mércores 3 na sesión de adultos, á que asistiron varias lectoras do club de xuvenil e moit@s convidad@s, tivemos a sorte de disfrutar da compaña da escritora Inma López Silva, para falar da súa última novela Aqueles días en que eramos malas, que @s Papalibros adultos limos no verán.
Inma ten raíces melidenses e, en primeiro lugar, compartiu con nós esa sensación de non saber chegar en coche a un lugar onde viña en bicicleta de nena, cando no Marquiño aínda non estaba construído o novo instituto que substituíu ao vello edificio que hoxe é o Multiusos.
Aqueles días en que eramos malas dá conta das vivencias de cinco mulleres que comparten espazo nun cárcere de mulleres. Unha monxa, unha colombiana, unha prostituta, unha funcionaria de prisións e unha escritora, que non casualmente se chama Inma, fálannos do seu pasado e o seu presente por boca desta última escritora que manexa aos personaxes ao seu antollo xogando coa realidade e a ficción. Ademais de describirnos o complexo mundo dos cárceres, a novela abre un debate sobre o tema da maternidade, que vén sendo un sutil fío que ganduxa a todas estas mulleres. Nas case tres horas que pasamos na compaña de Inma falamos do código penal, dese descoñecido mundo das prisións ao que gran maioría só coñecemos polas películas e ficción, de reinserción... Pero sobre todo falamos da maternidade, omnipresente en todos os personaxes e sobre como está sobredimensionada no mundo actual. Foi unha sesión emocionante na que, como case sempre, a literatura nos leva a falar da vida, dos grandes temas que nos preocupan.
Despedimos a sesión de adultos recollendo a próxima lectura, Tú no eres como las otras madres, de Angelika Schrobsdorff, un libro do que xa levábamos moito tempo detrás e que promete.

DESPEDIMOS O CURSO CON LIBROS

Como xa é tradición, nesta última semana de clases despedimos os clubs de lectura en Furelos. Despois de esperar varias semanas, chegou o verán por fin e os xuvenís puidemos ter o noso último xantar compartido este luns 18 e os benxamíns o mércores 20. mágoa que as augas do río Furelos non sexan aptas para o baño, porque máis de unha se bañaría. @s Papalibors queremos reivindocar un medio limpo e ríos no que poder bañarnos!!
E agora, como bos papalibros que somos, toca proverse para o verán. Sería unha mágoa que cando máis tempo soemos ter para ler, quedasen os libros nos andeis da bilioteca, por iso na biblioteca Xaquín Yebra  poñémolo fácil: ate 25 recursos con tres meses de préstamo!! con estas rebaixas tan estupendas, nesta última semana de clases a biblioteca sufriu unha oleada de atracos. Saqueadores de todas as idades e condicións, provistos de bolsas, arramplaron con material abondo para sobrevivir estes dous meses e, cousa estupenda, por fin os andeis están floxos e caben perfectamente os libros!!
Facemos un repaso das nosas lecturas durante este curso.

Novela
O anxo negro, Manuel Gago
A viaxe de Gagarin, A. Fernández Paz
O retorno, B. Schlink
En el tiempo de las mariposas, Julia Álvarez
Vinieron como las golondrinas, William Maxwell
Bícame, Frank, Miguelanxo Fernández,
Izan o da saca, X. Quiroga
La invención de Hugo Cabré, Brian Selznick
Expiación, Ian Mc Ewan
Un viejo que leía novelas de amor, Luís Sepúlveda

Cómic/ Novela gráfica
Crónica Birmanas, Guy Delisle
La misma diferencia, Derek Kirk Kim
El vecino, Santiago García Arrugas, Paco Roca
Vida de nai, Gema Sesar
Maus, relato dun supervivinte, A.Spiegelman
Houdini, el rey de las esposas, O. Palmer
Persépolis, M. Satrapi
La perdida, Jessica Abel
Jamás tendré 20 años, J. Martín
La Casa, Paco Roca
Una historia de violencia, John Wagner e Vincent Locke
Calles de arena, Paco Roca

E non nos despedimos sen anunciar que xa temos prevista a inauguración do novo curso escolar coa escritora Inma López Silva, moi vinculada a melide, coa que falaremos da súa última publicación Aqueles días en que eramos malas. E sobra dicir que aínda que virá para a sesión de adultos na primeira semana de outubro, estades tod@s convidadas. Feliz verán e felices lecturas!!

ROTEIRO NA RIBEIRA SACRA CON XABIER QUIROGA

O pasado martes 15 de maio, cun tempo espléndido, tivemos a sorte de poder facer un roteiro pola Ribeira da man Xabier Quiroga para percorrer os algúns dos espazos e paisaxes que aparecen na súa novela Iza o da saca. Participamos nesta actividade convidad@s polo club de lectura do IES Camilio José Cela e a súa coordinadora, Violeta Pérez Figueroa.
No club de adultos xa leramos esta obra e contaramos coa presenza de Quiroga. Nesta ocasión sumouse a lectura o club de xuvenil e, a pesares das dificultades do texto, tivemos incluso lectoras do club de benxamíns, como Omaira Vidal, que con só 12 anos debe ser unha das lectoras máis novas desta obra.
A nosa visita comezou polo Ecomuseo do Pazo de Arxeriz, un dos escenarios da novela, que rastrea o Reina trantando de seguir a pista a aqueles nazis fuxidos. O Cabo do Mundo, a praia da Cova,onde agúns ousad@s incluso se bañaron, e unha andaina en Marce completaron o resto da xornada.

AS PAPALIBROS ADULTAS CON MIGUEL ANXO FERNÁNDEZ

Despois dun tempo de silencio neste blog, pero non exento de voraces lecturas, reaparecemos para dar conta da nosa estupenda sesión con Miguel Anxo Fernández arredor dunha das súas novelas da serie do detective Frank Soutelo, Bícame, Frank.
A pesares de que tivemos que cambiar a nosa reunión para un xoves ás 16.30, a pouca idoneidade da hora non impediu que nos xuntásemos un grupo dunhas 15 persoas, das máis de 20 que formamos o club de adultos.
Miguel Anxo falounos da súa gran paixón, o cine, e de como na súa novela están presentes as técnicas da sétima arte. Da súa man descubrimos como xurde unha novela policía e, en particular como xorde o universo de Frank Soutelo: Pat Pérez, Poncio, Sugar Jones, a tía Castora...
Bícame, Frank, está ambienta polo ano 2011 coa crise económica como telón de fondo, o 15M e a Primavera Árabe. Frank Soutelo nesta ocasión terá que seguir a pista dun valioso papiro exipcio disputado por numerosa xente e que  vai deixando un rego de cadáveres. Curiosamente esta novela foi escrita xusto antes do sonado roubo do Códice Calixtino.

Pasamos máis de dúas horas na agradable compaña de Miguel Anxo e, como é tradición no noso club, non faltaron as lambetadas. Nesta ocasión escollimos respostería melidense: ricos, amendoados, melindres... coa (interesada) intención de que Frank Soutelo apareza nunha próxima novela desgustando a nosa deliciosa repostería e Melide se incorpore ás rutas gastronómicas do detective, que non deixa de ser un auténtico bon vivant.

Agardamos volver a ter a Miguel Anxo Fernández no noso club para falar dalgunha das súas últimas creacións como Blues para Moraima, un interesante thriller no que recrea a historia dun cineasta galego exiliado, trasunto de Carlos Velo, personaxe sobre o que M. A. Fernández é especialista.

AGASALLA UN PRÉSTAMO

Este Nadal na biblioteca Xaquín Yebra puxemos en marcha a campaña "Agasalla un préstamo". Trátase de algo moi sinxelo: escollemos unha lectura ou película da biblioteca pensando en que pode gustarlle á persoa á que queremos agasallar e a solicitamos en préstamo para que ela a lea durante o Nadal. Logo procuramos preparar o mellor posible o noso agasallo, facemos un fermoso paquete con materiais reciclados, porque está claro que ademáis de gratuíto o noso galano ten que ser ecolóxico, engadimos unha tarxetiña e alá, a disfrutar.
Nesta última semana Papalibros de todas as idades buscaron inspiración nos andeis da nosa biblioteca para facer o seu agasallo.
Está claro que non necesitamos gastar diñeiro nin consumir para facer facer un regalo magnífico e que as mellores lecturas non teñen prezo.

GALICREQUES DE NOVO

Como xa vén sendo un costume consolidado entre os Papalibros, nos clubs de benxamín e xuvenil acudimos un ano máis ao Festival de Galicreques, en Compostela, para ver Macbeth, ya somos el olvido que seremos, a cargo da compañía Alauda Teatro. Ademais do Club de Lectura tamén participaron nesta actividade o alumnado e Artes escénicas e o de Literatura Universal.
Nada máis chegar a Compostela visitamos unha exposición de marionetas africanas na Biblioteca Anxel Casal. Aproveitamos o noso paso pola Praza do Obradoiro para gozar unha vez máis das vistas da Catedral, a pesares de estar andamiada, do Hostal dso Reis Católicos, Pazo de Fonseca, Pazo de Raxoi... e repasar cousas que vimos na clase estes anos. Tamén pasamos pola Praza de Praterías,onde fixemos unha foto de "familia".
Xa no teatro Principal, Alauda Teatro ofreceunos unha magnífica representación de Macbeth, versión do clásico de Shakespeare, que no seu título fai referencia a un soneto de J. L. Borges. Os actores usaron marionetas de diferentes tipos e unha serie de recursos escénicos, entre os que destaca a música en directo, para contarnos a historia deste personaxe ambicioso, que xunto coa súa muller, a pérfida Lady Macbeth, consegue a coroa de Escocia grazas a súa falta de escrúpulos. O argumento foi un pouco complicado para os máis pequenos, pero despois dun repaso no bus de volta entendímolo algo mellor.
Unha das cousas máis proveitosas para todos nós, pero especialemente para o alumnado de Artes Escénicas, foi a conversa cos actores ao final da obra, na que ademais de contestar ás preguntas do público, derónnos consellos para unha posta en escena con marionetas.
 

INAUGURANDO CURSO CON MANUEL GAGO

A semana pasada o Club de lectura Papalibros retomou a súa actividade cun convidado de luxo, Manuel Gago, que acudiu a Melide a compartir con nós impresións sobre a súa última novela, O anxo negro, obra que afortunadante escollemos no club de adultos como lectura de verán.
A acción transcorre na Galicia dos anos 80. Os habitantes dunha aldea da Costa da Morte acoden a Nicolás Bren, un capitán retirado de Corcubión, para que lles axude a recuperar a imaxe dunha santa moi venerada e querida que lles foi roubada na igrexa parroquial. O capitán, coa axuda de Andreu, un barman bo coñecedor do medio, irá destapando unha trama corrupta, na que a Igrexa ten un importante papel, ao tempo que descobre a importancia dunha talla vinculada a momentos decisivos da nosa Historia e da Historia europea.
O anxo negro é, polo tanto, ademais dunha novela negra, unha novela que, sen poder clasificarse como novela histórica, transita pola historia do noso país e se compromete coa nosa identidade. Xunto a personaxes reais como Pedro Froilaz, don Juan de Austria ou a mesma raíña de Escocia María Estuardo, desfilan outros ficticios como Diego de Carnota, un engaiolante nobre de espíritu renacentista inspirado en Diego Sarmiento de Acuña e/ou no conde de Gondomar. Sucédense tamén distintos escenarios e tempos como a Galicia de Xelmírez, a España de Carlos I e as guerras de relixión europeas, a Inglaterra isabelina ou a represión fascista na Galicia da Guerra Civil e posguerra. A estes elementos históricos, éngadense os humanos, os que dan vida e forza literaria ao relato: as tres Marías, mamá Sula, a gran matriarca, Andreu, o fillo de inmigrantes que loita por facerse un sitio na comunidade ou, como non, o maquiavélico don Servando. Con todos estes fíos Gago tece unha historia perfecta e fluída que consegue atraparnos e tamén emocionarnos.
Pero se a lectura foi unha aventura apaixoante non o foi menos a xornada compartida con Manuel na que, ademais de comentar polo miúdo moitos aspectos da novela, compartiu con nós o seu saber sobre patrimonio e etnografía e vivencias persoais neste campo, que poderían ser perfectamente o argumento dunha nova novela. A súa excelente capacidade comunicadora fixo que o tempo voase e que, tras case tres horas de sesión, se nos fixese pouco. Agardamos con impaciencia unha próxima entrega e poder disfrutar de novo da súa compañía.